irisnews257
Diogo Jota yapfiriye mw’isanganya ry’imodoka ryabereye ahitwa Zamora mu gihugu ca Espagne mu gitondo co kuri uyu wa kane, aho yari kumwe na murumuna we, nawe nyene yahavuye ahasiga ubuzima nk’uko vyatangajwe n’ikinyamakuru #Marca.
Imodoka yarimwo ikaba yataye ibarabara, mu nyuma yaka umuriro.
Umukinyi Diogo Jota yitavye Imana yari nde ?
Amazina yiwe ni Diogo José Teixeira Da Silva yavukiye i Porto muri Portugal igenekerezo rya 4/12/1996.
Mu mugwi wa Gondomar Sc niho Jota yatanguriye gukina umupira wa maguru gushuka ku myaka 16. Mu nyuma yaraciye mu migwi nka Benfica Lisbonne, Paços de Ferreira na Atletico Sc zose zo muri Portugal.
Yarakiniye n’imwe mu migwi ikomeye ku mugabane w’i Buruya nka Atletico de Madrid, Fc Porto na Wolvergampton
Kuva mu myaka wa 2020 Diogo Jota yari umukinyi wa Liverpool aho yari amaze gutahukana ibikombe bine birimwo n’igikombe ca Premier League.
Diogo Jota yakina mu kibanza co gusatira (attaquant) yari amaze kwinjiriza umugwi wa Liverpool ibitsindo 49 mu myaka itanu yari akiniye uyu mugwi.
Mu mugwi wiwe nserukiragihugu wa bato hamwe n’ abakuze Diogo Jota yari amaze gukina inkino 78 awinjiriza ibitsindo 28 ndetse gutahukana ibikombe bibibi vya Ligue des Nations mu 2019 no mu 2025
Diogo Jota yitavye Imana, asize umukenyezi umwe abana batatu (abahungu babiri n’umukobwa umwe). Hari haciye imisi 11 uyu mukinyi agize ubugeni n’umukenyezi wiwe Rute Cardoso.
Urukino rwiwe rwa nyuma mu mupira w’amaguru yaheruka kurukina ari kumwe n’umugwi nserukiragihugu wa Portugal hari kw’igenekerezo rya 5/06/2025 ku rukino rwa nyuma mu gikombe ca Ligue des Nations ndetse baragitahukanye batsinze umugwi wa Espagne.
Iyi nkuru y’urupfu rwa Diogo Jota ikaba iriko iravurwa cane mu binyamakuru vy’inkino bikomeye kw’isi kuva muri iki gitondo.
