Jean de Dieu Nahabakomeye
Ihiganwa rya Miss Burundi 2026 ryuguruwe icese, inyuma y’imisi hari abibaza nimba rizoba canke ritazoba. Abategura iri higanwa batangaje ikirangamisi, ibisabwa ku bigeme bipfuza guhiganwa hamwe n’ubushimwe butegekanijwe.
Mu kiganiro n’abamenyeshamakuru cabaye kuri uyu wa 28 Myandagaro 2026, ishirahamwe Ingo SA, ritunganya ihiganwa rya Miss Burundi, ryaratanze umuco ku vyari bimaze imisi bibazwa ku bijanye n’iryo higanwa.
Umugwi utunganya Miss Burundi, urongowe na Rossalyn Kamariza, umuyobozi mukuru wa Ingo SA, wamenyesheje ko kwiyandikisha ku bigeme bipfuza guhiganira ikamba rya Miss Burundi 2026 bizotangura ku wa 29 Myandagaro 2026, bikazorangira ku wa 28 Nyakanga 2026.
Igice ca nyuma c’iryo higanwa (Final) kizoba kw’igenekerezo rya 12 Kigarama 2026, mu gisagara ca Bujumbura
Agashimwe ka Miss Populaire gashobora kutazotangwa muri Miss Burundi 2026
Muri uyu mwaka, harashobora kuba impinduka ku bijanye n’ubushimwe buhabwa abatsinze.
Abategura iryo higanwa bavuze ko ikamba rya Miss Populaire rishobora kutazoba mu yazotangwa, kiretse habonetse umufatanyabikorwa yemera gutanga uburyo bukenewe kugira ako gashimwe gatangwe.
Miss Burundi azotahana imiriyoni 25 n’imodoka
Ku bijanye n’ubushimwe, Miss Burundi 2026 azoronka imiriyoni 25 z’amarundi hamwe n’imodoka.
Icegera ca mbere azoronka imiriyoni 15 z’amarundi, mu gihe icegera ca kabiri azohabwa imiriyoni 10 z’amarundi.
Imyaka, uburebure n’ibindi bisabwa
Ku bigeme bipfuza kwiyandikisha, harashinzwe ibisabwa bitegerezwa kwubahirizwa.
Uwipfuza guhiganirwa ikamba rya Miss Burundi 2026 ategerezwa kuba ari umwigeme w’Umurundikazi, afise imyaka iri hagati ya 22 na 25.
Ategerezwa kandi kuba afise uburebure butari munsi ya metero 1 n’isantimetero 60 (1m60), ibiro bitarenza 65 kg, ubunini bw’igikiriza buri hagati ya 70 na 90 cm, mu gihe ubunini bw’inda butegerezwa kuba buri hagati ya 60 na 75 cm.
Si ivyo gusa. Uwo mwigeme ategerezwa kuba ashobora kuvuga neza indimi zirimwo Ikirundi, Igiswahili n’Icongereza.
« Ihiganwa duherutse gutegura ntiryari ryoroshe na gato »
Rossalyn Kamariza yavuze ko ihiganwa rya Miss Burundi ry’umwaka uheze ryagiye rirangwamwo ingorane, cane cane zijanye n’uburyo bwo kuritunganya.
« Iri higanwa duherutse gutegura ntiryari ryoroshe na gato. Haribonekeje intambamyi ijanye n’uburyo butashoboye gukwira ngo ivyaranguwe vyose bishobore kurihwa ku gihe. »
Yavuze ko abunganira iryo higanwa batabuze, kuko bamwe batanze amafaranga mu gihe abandi bashigikiye ibikorwa vyaryo mu buryo bw’ibikoresho na services.
« Twarashoboye kuronka abunganira ibikorwa batari bake, aho ibice 40% bashoboye gutanga uburyo, ibice 60% na bo bashigikira ihiganwa mu bijanye n’ama services ajanye n’itunganywa ry’iri higanwa. »
Nk’uko Kamariza yabandanije abivuga, uburyo bwari bwabashije kwegeranywa bwashoboye kuriha 57% vy’ibikorwa vyose gushika ihiganwa rirangiye.
« Naho vyagenze uko, twagumye twiga imigambi yotuma twegeranya uburyo bwotuma n’ibitarishwe bishobora kurihwa. »
« Uno musi turi n’iteka ryo kubamenyesha ko tutirukiye ubusa »
Kamariza yavuze ko, naho urugendo rutari rworoshe, abategura Miss Burundi bamaze kuronka abandi bafatanyabikorwa bazobafasha kurangiza ibirarane vy’amafaranga.
« Ntivyari vyoroshe, ariko uno musi turi n’iteka ryo kubamenyesha ko tutirukiye ubusa. Twararonse abatwunganira, ari co gituma mu kiringo kitaramburanye ibice 85% bizoba bimaze kurihwa, ndetse n’ibisigaye ntibizoteba gutunganywa. »
Miss Burundi, Kaneza Kellia Lagloire, yari asanzwe afise ikamba yarangije ikiringo ciwe ku wa 25 Mukakaro 2026. Abategura iryo higanwa bavuga ko guteba gutangura kwabaye kubera cane cane kurondera abafatanyabikorwa bashobora gushigikira iryo higanwa.
« Haduga, hamanuka, turabandanya urugendo »
Ku bijanye n’abagerageza kubera intambamyi igikorwa ca Miss Burundi, Kamariza yavuze ko abategura iryo higanwa babona ko hari abagerageza guca intege abahiganwa.
Ati : « Turaneguye abasutse abatowe mu kubaburabuza ngo ntibakore ico bemereye Abarundi izuba riva. Ahubwo bakabahimiriza gushira inyungu zabo imbere y’inyungu rusangi. »
Yavuze ko abigeme nk’abo atari bo bakeneye mu rugendo rwo guteza imbere igihugu.
« Abo sibo bigeme twipfuza, si nabo bakenyezi b’imboneza igihugu gikeneye ngo gishobore gushitsa imbonakazoza yacu. »
Mu gusozera, Kamariza yavuze ko, naho hari intambamyi, abategura Miss Burundi bagiye kubandanya n’itunganywa ryayo, ati : « Haduga, hamanuka, turabandanya urugendo. Nico civugo cacu uno musi. »
